Pedong-mag-bise ni Jonas

CEBU, Philippines – Si kanhi Mayor Alfredo “Pedong” Ouano nga amahan ni kanhi Mayor Thadeo Ouano hayan mokandidato sa pagka-bise mayor isip tandem ni Mayor Jonas Cortes sa 2010 nga eleksiyon.

Kini iyang gipadayag sa dihang nahinabi sa DyKC niadtong miaging adlaw kinsa miingon nga ang kampo sa mayor sa dakbayan nagtinguha karon sa pagpakighiusa og balik ngadto kaniya.

Matud pa niya nga ang sabot-sabot unang natigayon sa dihang nakigtagbo kaniya si Kapitan Sol Cabahug sa Looc ug gisundan kini sa laing higayon sa pagpakitagbo usab kaniya ni City Administrator Briccio Boholst.

Si Ouano miingon nga ang gitinguha nga paghiusa og balik sa kampo ni Cortes posible usab nga mahitabo kun kini matinud-anon ug gitumong alang sa kaayuhan sa mga Mandauehanon.

Hinuon si Kapitan Glenn Bercede sa barangay Banilad nga nahinabi sa Banat News miingon nga walay mga kausaban sa ilang grupo sa 2010 election.

Dugang pa niya nga sa ilang gikasabotan sa grupo nga si Cortes nga magpasubli sa iyang ikaduhang termino isip mayor sa dakbayan siya gihapon ang tandem nga bise mayor niini.

Matud pa niya nga ang mabag-o lamang sa ilang grupo mao ang pipila ka mga sakop sa konseho sanglit ang ilang kanhi mga kauban nga dili na mosalmot sa pagpapili isip sakop sa konseho ilang pagahulipan aron makumpleto ang line-up.

Si Bercede tandem ni Cortes sa 2007 nga eleksiyon apan gipildi kini ni Fortuna nga mao usab ang tandem ni Jovito Thadeo “Jonkie” Ouano nga anak ni kanhi Mayor Thadeo Ouano. – Romeo T. Limpangog (BANAT NEWS)