Registration ipahimo sa barangay

CEBU, Philippines – Gitinguha ni Konsehal Jonard “Ahong” Chan nga ang Commission on Election (Comelec) sa dakbayan sa Lapulapu mang-rehistro sa kabarangayan.

Unod kini sa sulat nga iyang gipadala ngadto kang Lapulapu City Comelec Registrar Anjaneth Libanan nga iyang gipadala niadtong miaging adlaw.

Si Chan mipasabot nga dako kaayo ang kalangan sa oras alang sa mga magparehistro nga motuyo pag-adto sa buhatan sa Comelec sa City Hall sa Lapulapu.

Nunot niini iyang gisugyot ang paghatag   og schedule sa matag barangay nga maoy ilang himoan sa pagpangrehistro.

Dugang pa niya nga gawas nga mausik ang oras sa mga nagtinguha sa pagparehistro, ang mga personnel sa Comelec mapakyas pa sa pag-atiman hangtod nga maabtan na lang og oras sa ilang pagsira ug pabalikon na lamang sa sunod adlaw alang sa pagparehistro.

Si Chan miingon nga ang kalangan ug kahasol sa mga tawo maoy hinungdan nga daghan sa mga botante ang dili lamang usab maghago pa sa pagparehistro.

Matud pa ni Chan nga ang pagpunay og balikbalik sa mga tawo nga nagtinguha sa pagparehistro nagpasabot usab nga dugang galastuhan sa ilang pagkaon og plete ang pag-adto sa Comelec.

Si Chan miingon nga mokabat lamang sa 50 ka tawo ang maatiman sa mga kawani sa Comelec sa matag adlaw gikan sa Lunes hangtod sa Sabado.

Katunga usab sa maong gidaghanon sa matag adlaw dili maatiman sa Comelec ug laing kalangan ug galastohan na usab sa mga tawo ang sunod adlaw nga pagbalik niini. – Romeo T. Limpangog (BANAT NEWS)