Polis nagpaboto'g armalite

CEBU, Philippines – Imbestigahon sa kadagkuan sa kapolisan sa lalawigan sa Sugbo ang usa ka sakop sa Tudela Police Station nga gipasanginlang midala sa iyang M16 Armalite rifle didto sa Negros ug nagpabuto pa gyud kay giingong nagpahambog didto sa iyang mga barkada.

Ang maong polis giilang si PO1 Randy Balansag gidakop sa mga sakop sa 11th Infantry Battalion sa Philippine Army nga nagbase sa Guihulngan human kini gireklamong nagpabuto sa Armalite diha sa baybayon sa barangay McKinley sa Guihulngan City Negros Oriental niadtong unang semana sa Hunyo.

Si Sr. Supt. Jesus Gacquing, hepe sa Cebu Provincial Police Office nagkanayon nga si PO1 Balansag taga Dumanjug apan nadestino sa Tudela Police Station ug ang asawa lumad nga taga Guihulngan nga maoy iyang gibisita didto.

Si Gacquing nagkanayon nga mopahigayon sila’g imbestigasyon nga administratiba batok kang PO1 Balansag tungod sa pagdala niini sa iyang armas sa ubang lugar.

Matud pa ni Gacquing nga adunay dakong tulubagon ug mag-atubang gyud si Balansag og kasong administratiba o kriminal kun mamatud-ang sad-an.

Sumala pang Gacquing nga wala tuguti ang mga polis nga makadala sa ilang mga tag-as nga kalibre sa armas sama sa Armalite ngadto sa ilang mga balay ug labaw na sa gawas na sa ilang hurisdiksyon.

Buot hinuon susihon ni Gacquing ang kamatuurang walay mabinlan si Balansag sa iyang armas diha sa ilang police station gumikan kay wala silay armory.

Sa mga nahipos nga mga report sa Banat News gikataho nga si PO1 Balansag ang nagpahambog sa iyang armas sa mga barkada niining mga estambay didto sa lugar ug mipabuto niini didto sa dagat.

Sa dihang gikahinabi sa Banat News si PO1 Balansag kini miangkon sa nahimong sayop, mipadayag sa pagmahay miingon nga iyang atubangon ang imbestigasyon.

Matud pa niya nga dako gyud ang iyang sayop nga nagpabuto siya sa lawod sa iyang Armalite bisan nasayod siyang dili kini firing range, sumala pa niya nangabang siya og pumpboat nianang sayo sa buntag uban sa mga silingan ug miadto sa payaw ug didto siya nagpabuto sa maong armas.

Sumala pa niya dunay mitug-an nga mga residente sa mga sakop sa 11th Infantry Battalion nga nakabase duol sa gihitaboan hinungdan nga giadto siya ug giimbitar sa ilang detachment.

Giklaro usab niyang wala siya dakpa kun dili igo ra siyang giimbitar sa mga sundalo ug gi-turn-over sa kapulisan sa Guihulngan. – BANAT NEWS