CEBU, Philippines – Dako kaayo ang pasalamat ni Vice Mayor Alan Bucao sa dakbayan sa Talisay nga nahipatik ang iyang ngalan sa ‘health card’ nga nadawat sa mga kabus nga Talisaynon gikan sa buhatan ni Mayor Socrates Fernandez.
Si Bucao nga maoy bugtong oposisyon sa konseho kinsa kasamtangang mihulip sa mibakasyong bise mayor nga si Lani Abarquez, nagkanayon nga wala siya’y kasayoran bahin niini ug si kinsa usab ang gipanghatagan sa mayor niini.
Bisan ang hepe sa buhatan sa social welfare Felipa Solana, nagkanayon nga diha na siya masayod sa maong health card dihang may duha ka tawo nga nagbitbit niini ug miadto sa iyang buhatan aron mangayo og hinabang. Miingon si Solana nga tambal ug bayad sa hospital maoy gihinabang niya sa nagdala sa maong mga card diin didto nahipatik sa maong mga card ang tanang ngalan sa mga konsehal sa dakbayan lakip na ang ngalan ni OIC Vice Mayor Bucao.
Hinuon dihang gisusi sa Banat News ang tinubdan, si Talisay City administrator Richel Bacaltos mao nay miangkon nga kining maong mga card giapod-apod ni Mayor Fernandez alang sa labing kabus nga mga molupyo sa dakbayan kinsa maglisod sa pagpalit og tambal ug sa pagbayad sa hospital kun kini ma-admit sa tambalanan.
Ang maghupot niining maong mga health card kahatagan og libreng tambal ug malibre usab sa bayranan sa hospital, matud pa ni Bacaltos.
Samtang si Mayor Fernandez wala kakuhai og pamahayag sa Banat News kay wala sa ilang balay ug dili usab makontak sa iyang cell phone. – Brenda D. Batuto (BANAT NEWS)