CEBU, Philippines – Padayong nagtinguha ang Cebu City Jail nga marehistro ang tanang binilanggo niini nga pabilin pang nagpaabot sa husay sa ilang mga kaso. Kini bisan pa man kung gisalikway sa Comelec ang nahaunang hangyo niini nga mopahigayon og satellite registration sa nahisgutang bilanggoan.
Matud pa ni City Jail Warden Supt. Efren Nemenio nga ang mga binilanggo na maoy ilang ihatod ngadto sa Comelec aron marehistro.
Ang gipaabot na lang karon ni Nemenio mao ang court order aron makagawas ang gatusan ka mga binilanggo sa City Jail alang sa maong katuyoan. Mokapin sa 300 ka mga piniriso nga padayong nagpaabot sa hearing sa ilang mga kaso ang gusto sa Jail Warden nga marehistro.
Kini aron makabutar sa presidential ug local election nga gitakda sa buwan sa Mayo sunod tuig kung dili makonbikto sa ilang giatubang nga asunto.
Sa nakalabay nga piniliay kapin sa usa ka gatos ka mga binilanggo sa City Jail ang nakabutar ug gihatod ngadto sa lain-laing voting precincts sa kabarangayan. – Elly Bolonos (BANAT NEWS)