Mga batan-on ang kuhaon sa BOPK

CEBU, Philippines – Nagdumili gihapon si Mayor Tomas Osmeña pagbutyag sa ilang line-up alang sa sunod tuig nga eleksyon bisan kung gipahibawo na ni Bise Mayor Michael Rama nga sila duna nay long list sa mga kandidato.

Gusto ni Osmeña nga paunahon pagbutyag ang mga sakop sa oposisyon una nila hashasan ug ipahibawo ang ilang official line-up.

Apan karon pa lang gilatid na sa mayor ang kwalipikasyon alang sa pagpili og mga kandidato ug dakong bintaha kadtong mga batan-on nga naa sa lista.

“Generally speaking we look for the younger ones because they are physically active, they don’t have arthritis,” nagkanayon si Osmeña.

Gawas nga aktibo ang mga batan-on miingon ang mayor nga kini kuryuso usab ug interesadong masayod sa wala niini mahibaw-i.

Matud ni Osmeña nga laing bintaha sa mga batan-on mao nga kini creative ug dunay maayong absorption capacity nga wala na sa mga edaran.

Tungod sa maong kalamboan nagkagamay na ang kahigayonan sa pipila ka edaran nga mga kaalyado ni Osmeña nga malakip sa ticket niini.

Partikular na niini ang pipila ka consultant sa siyudad nga nisugod na pagsuroy-suroy sa kabarangayan ug nipaila-ila sa ilang kaugalingon.

Una nang gibutyag ni Rama nga nalakip sa ilang lost list mao ang pipila ka mga kanhi konsehal sa dakbayan ug duna say mga sakop usab sa media.

Nasayran nga ang media personality nga konsehal sa siyudad nga si Sylvan “Jack” Jakosalem anaa na sa iyang ikatulo ug katapusang termino ug hulipanan.

Gawas kang Jakosalem, ang laing third termer councilors sa amihanang distrito mao sila si Christopher Alix ug Nestor Archival. Samtang sa habagatang distrito nga dili mahimong magpasubli sa katungdanan mao sila si konsehal Gerardo Carillo ug Arsenio Pacaña. – BANAT NEWS