3 ka lolo naghikog

CEBU, Philippines – Tulo ka mga lolo – usa retiradong sakop sa Philippine Army nga nag-antos sa kasakit sa igo sa bala sa iyang tiil sa dihang aktibo pa kini sa serbisyo, laing usa nagmasakiton sa pantog, ug ang usa naguol kay ang apo gidala sa Manila – naghikog sa managlahing takna ug lugar. Kanilang tulo, usa ang nakutloan sa kinabuhi ug ang duha anaa sa kritikal ang kahimtang.

Ang retiradong sakop sa Philippine Army nga si Master Sgt. Jimmy Honoredes, 62, nagpusil sa iyang kaugalingon sulod sa ilang panimalay sa dalan Almendras, barangay Suba, dakbayan sa Danao niadtong miaging hapon.

Si SPO1 Glen Manulat sa Danao Police Station nagkanayon nga si Honoredes napalgang naglunang sa iyang dugo sa iyang pag-umangkon nga si Teofilo Orquia, sulod sa banyo sa ilang balay.

Nasuta sa imbestigasyon nilang SPO1 Manulat nga si Honoredes nagpusil tumong sa iyang ulo gamit ang kalibre .357 nga rebolber. Nakit-an ang kabhang sa bala ug laing lima ka buhing bala sa maong kalibre sa armas.

Si Luzviminda miasoy sa kapolisan nga ang iyang bana dugay nang naghambin sa pagpanakit sa iyang tiil nga naigo sa bala sa dihang aktibo pa kini nga sakop sa Philippine Army.

Anaa kini karon sa kritikal nga kondisyon sa Vicente Sotto Memorial Medical Center.

Samtang patay na nga nagbitay sulod sa balay ang laing lolo nga si James Canillo, 62, nga residente sa barangay Kabitoonan, dakbayan sa Toledo niadtong Domingo sa alas 11 sa gabii.

Matud pa ni PO3 Roel Tadique sa Toledo City Police Station sa dihang nahinabi sa Banat News nga si Canillo naguol kay ang pinangga kaayo niining apo gidala ngadto sa Manila.

Si PO3 Tadique nagkanayon nga si Canillo namatikdan sa kabanay nga hubog nang mipauli alas 4 sa hapon ug nangita kang Jade Vincent, ang pinangga kaayo niyang apo.

Apan sa dihang gisultian kini nga gidala si Jade Vincent sa iyang amahan ngadto sa Manila, namatikdan kini nga naguol pag-ayo tungod kay mao kini nag-atiman sa bata sukad sa pagkatawo niini.

Ang duha ka anak ni Canillo nga si Jane ug Dehlia mibiya sa balay diin didto ang ilang amahan nga nagmagul-anon. Gipatay nila ang suga atol sa ilang pagbiya.

Pagka-alas 11 sa gabii, naabtan ni Jane ug sa bana niining si Lodiver ang tigulang nga nagbitay. Ang liog niini gihiktan og hose nga ang pikas tumoy gihikot sa kahoy ubos nga bahin sa atop sa balay.

Gidala kini sa Toledo City District Hospital, apan gideklarar kini nga patay nang naabot kanila.

Ang ikatulong lolo nga nag-edad og 63-anyos nagpusil sa iyang ulo atubangan sa iyang asawa ug mga anak sa ilang balay sa sitio Basbas, barangay Marigondon, dakbayan sa Lapulapu alas 7 sa gabii.

Si Francisco Nonong mipusil-patay una sa tulo ka binuhing iro sa wala pa magpusil sa iyang tampihak.

Ang asawa ni Nonong nga si Carmencita miasoy ngadto ni SPO3 Rex Ybañez nga naguol ang iyang bana tungod sa gihambin niining sakit sa pantog ug sa wala pa kini magpusil sa ulo, gikan kini sa VSMMC nagpataod og plastik nga tubo aron kaagian sa ihi.

Pag-uli gikan sa VSMMC, namatikdan si Nonong nga magsige na lamang og hinuktok ug misulod sa lawak ug pipila ka oras ang nakalabay nasigpatan kining migawas sa lawak nga nagbitbit og rebolber nga kalibre .357.

Human gipamatay ang tulo ka iro gamit ang rebolber, gipakalma kini sa iyang pamilya. Nahurot unta ang mga bala sa dihang gipamusil niini ang mga iro, apan nakahigayon kini sa pagkarga, sumala pa ni SPO3 Ybañez.

Human kargahi og mga bala ang tambor sa rebolber, gidul-it kini sa ulo ni Nonong ug gipabuto samtang diha sa iyang atubangan ang iyang pamilya.

Nahagba sa sawog si Nonong hinungdan nga gidala kini sa VSMMC. – BANAT NEWS