Idlas nga pusher na-buybust sikop

CEBU, Philippines - Usa ka giingong idlas nga level two drug pusher sa habagatang bahin sa probinsya sa Sugbu ang nadakpan sa kapulisan sa lungsod sa Santander human sa gipahigayong buy bust operation kagahapon sa kaadlawon sa barangay Bunlan sa nahisgutang lungsod.

Si Insp. Richard Oliver sa Santander Police Station nga gikahinabi sa Banat News nagkanayon nga ilang nadakpan si Hernani Tano ,22, nagpuyo sa nahisgutang dapit apan nia na dinhi sa dakbayan sa Sugbu nag-estar.

Si Insp. Oliver, nagkanayon nga ilang gihimo ang buy bust operation sulod sa diskuhan sa nahisgutang barangay nga nagsaulog sa ilang kapistahan human dunay impormanteng mibutyag nga mibalik ang maong drug pusher nga nagdala’g mga drugas.

Ang kapolisan wala maglangay ug milusad dayon og buy bust operation batok sa suspek gamit ang P1,500 nga salapi aron makapalit og shabu sa suspek.

Ang suspek nga wala makabantay nga polis diay ang mipalit sa iyang baligyang shabu wala makaugpo dihang gikalitan sa pagsikop.

Matud pa ni Insp. Oliver nga duha ka mga gagmay’ng pakete sa shabu ang nakuha kang Tano uban sa laing tulo ka mga paketeng wala nay sulod, apan nakuhaan pa usab nila'g laing tulo ka mga paketeng shabu nga gibutang sa motorsiklo niini.

Gihulagway niini nga idlas nga drug pusher si Tano ug taud-taud na nilang gisundan apan kanunay kining makaipsot sa ilang pagahimuong operasyon.

Gibutyag niini nga usa ka level two nga drug pusher si Tano nga makabaligya og kapin 50 gramos nga shabu sa halos tanang lugar sa habagatang bahin sa probinsya nga iyang pinalit gikan sa dakbayan.

Nasuta usab nga kagahapon duna pay laing 15 ka paketeng nabaligya ang suspek, gikatahong “order” kini sa mga durugista sa maong lungsod. – BANAT NEWS