Gitusak og kutsilyo samtang natulog

CEBU, Philippines - Gitusaktusak og kutsilyo ang usa ka 43-anyos nga trabahante samtang natulog ibabaw sa lamesa atubangan sa ilang balay sa J.M. Basa sa barangay Sawang-Calero ning dakbayan niadtong Sabado sa gabii.

Si Carlos Abejar, alyas Intoy, 43, gikatahong natulog niadtong tungura ug nahigmata nalang dihang kalit kining gitusaktusak og kutsilyo sa silingang si Adriano Garcia, alyas Magta,50.

Sa imbestigasyon sa kapolisan nakaangkon og mga samad sa iyang suwang, walang bahin sa abaga, bukton ug liog si Abejar. Samtang ang suspetsado mikaratil pagdagan palayo sa nahisgutang lugar human makamata ang biktima.

Si Abejar daling gidala sa Cebu City Medical Center ug giingong talandugon pa ang kahimtang niini atol ning pagsulat sa balita.

Nasayran sa kapolisan nga dugay na nga may panagbangi ang duha ug mao karoy gitutukan sa kapolisan nga motibo sa pagsuway pagpatay ngadto sa biktima. – BANAT NEWS