Oposisyon mi-alma sa gisulti ni Tomas

CEBU, Philippines - Dili madawat sa oposisyon sa dakbayan sa Sugbo ang pamahayag ni Mayor Tomas Osmeña nga ang labing lig-on nga mga kandidato niini mao ang mga reject o pinilian gikan sa Bando Osmeña Pundok Kauswagan (BOPK).

Gani miingon ang mayor nga kini maoy hinungdan nga dili una nila ibutyag ang ilang official line-up tungod sa kadaghan sa gustong magpapili ubos sa ilang pundok.

Kini tungod kay ang dili madala sa ilang tiket giingon ni Osmeña nga kuhaon usab dayon sa oposisyon ug maoy ipuno sa nagkuwang niining line-up. 

Apan matud sa usa sa mga haligi sa oposisyon sa siyudad nga si Jonathan Guardo nga siya walay nahibaw-an nga dunay gisalikway sa BOPK nga nagpapili ilawom sa ilang grupo.

“That did not happen at all kay kinsa may reject nga kandidato nila nga among gipadagan wala man siguro,” sumala ni Guardo.

Gibutyag ni Guardo nga kumpleto na ang ilang mga kandidato pagka-kongresista sa amihanan ug habagatang distrito sa dakbayan alang sa sunod tuig nga eleksyon.

Gipadayag ni Guardo nga ang iyang konsentrasyon karon mao ang south district samtang si Kapitan Mary Ann delos Santos usab sa north district.

Masaligon si Guardo nga modaog na sa umaabot eleksyon human usab maangkon ang unang kapildihan sa nakalabay nga piniliay.

Nagkanayon ang maong negosyante nga walay hunong ang iyang pagtabang sa mga molupyo sa south district bisan pa man kung napukan sa miaging eleksyon.

Gani ang gihimo ni Guardo nakapabalaka usab ni Osmeña tungod kay giingong wala pa mokisaw ang iyang mga kaalyado.

Gusto ni Osmeña nga mohimo na usab og lakang si Bise Mayor Michael Rama niini kinsa maoy iyang gi-endorso pagkamayor sa BOPK sa 2010 elections.

Gipasalig na hinuon sa bise mayor nga ilang lingkoran sa iyang runningmate nga si Joy Augustus Young niining semanaha ang ilang plano alang sa umaabot nga piniliay. – BANAT NEWS