CEBU, Philippines - Namatay ang usa ka tawo ug grabe usab nga naangol ang kauban niini sa dihang ang motorsiklo nga ilang giluwanan nalamba sa center island sa dalan Maximo Patalinjug, barangay Basak, dakbayan sa Lapulapu alas 12 pasado ang takna sa miaging tungang gabii.
Ang namatay mao si Amer Gaviola Candilaza, 36, minyo nga lumad nga taga Misamis Occidental ug temporaryong nagpuyo sa sitio Buyong, barangay Maribago, dakbayan sa Lapulapu ug ang grabe nga naangol mao si Arnold Rivera, 37, minyo nga nagpuyo usab sa maong dapit.
Si PO2 Jude Marifosque sa traffic section sa kapolisan sa maong dakbayan nga nahinabi sa Banat News miingon nga paingon na pauli sa ilang panimalay sa sitio Buyong barangay Maribago silang Candilaza ug Rivera.
Dugang pa niya nga kusog nagdagan gikan sa karaang Mactan Mandaue Bridge ang motorsiklo apan s a paghidangat sa nahisgutang lugar, kalit lang misaliring ang motorsiklo nga ilang giluwanan hangtod nga nalamba ngadto sa center island.
Matud pa ni PO2 Marifosque nga atol sa pagkalamba sa motorsiklo, ang ulo ni Candilaza nabunal sa punoan sa Mahogany nga nahimutang sa taliwala sa center island nga maoy hinungdan sa grabeng kadaot.
Si PO2 Marifosque miingon nga dali nga gidala sa Emergency Rescue Unit Foundation (ERUF) sa Lapulapu City Hospital ang duha ka mga biktima apan si Candilaza gideklarar sa mga doctor nga dead on arrival. – BANAT NEWS