3 angol nadasmagan sa way preno

CEBU, Philippines – Tulo ka babaye, duha niini mga menor de edad ang naangol dihang nawad-an og preno ang usa ka sakyanang gidumbol sa trak de karga didto sa D. Macapagal Highway Poblacion siyudad sa Toledo niadtong Biyernes sa gabii.

Ang mga biktima mao si Jeryme Lape, 15, ang maguwang niini nga si Gemalyn Lape, 17, nga taga barangay Ibo, dakbayan sa Toledo, ug Charissamae Canoy, 25, dalaga, taga Bato, sa maong dakbayan.

Si SPOI Lorenzo Mahilum, traffic investigator sa kapolisan sa Toledo nagkanayon nga ang biktimang managsuon naglakaw sa daplin sa karsada dihang pag-abot nila sa maong lugar kalit lang gidombol sa trak de karga ang gisundan niining Mitsubishi Pajero nga gimaneho ni Rosamira Langgamon, 29, taga Bato, Toledo ug sakay niini ang biktima nga si Canoy.

Nasayran nga dihang nadumbolan sa de karga nga gimaneho ni Joseser Coronel, ang Pajero, nawad-an og preno ang naulahi hinungdan nga misutoy kini og dagan hangtod nga ang wala makabantay’ng managsuon nga naglakaw daplin sa karsada nadagit sa maong sakyanan.

Ang magsuong biktima pulos nakaangkon og mga samad ug pangos sa ilang kalawasan lakip   si Canoy nga nagsakay sa Pajero kay maayong pagkaparok niini sulod sa sakyanan.

Ang mga biktima gihatod dayon ngadto sa Toledo City District Hospital ingon man si Canoy apan gibalhin kini ngadto sa Vicente Sotto Memorial Medical Center (VSMMC) dinhi sa siyudad sa Sugbo.

Padayon pang gi-imbistigar sa kapulisan ang maong hitabo pagtumbok kun kinsay sad-an niini. – Darrel A. Carumba (BANAT NEWS)