CEBU, Philippines – Nagpasayloay sa atubangan sa kapolisan sa Presinto 5 sa Opao Police Station ang nagkaaway nga managhigala nga sila si Carlito Deloso, 25, ug Ereneo Senining Jr, hingkod, kinsa nag-inilogay og kutsilyo hangtod nga nasamdan si Deloso niadtong miaging semana.
Ang duha kinsa nag-ipon og puyo sa usa ka balay sa sitio Waling-Waling , barangay Opao, dakbayan sa Mandaue, miadto gyud sa kapolisan ug mipasalig nga wala nay kinihaay nga mahitabo.
Si SPO2 Ferdinand Tumakay sa Presinto 5 miingon nga wala na matanggong sa bilanggoan si Senining sukwahi sa unang gikataho sa Banat News sanglit ang duha nagkasinabot man nga magpasayloay sa usa’g-usa niini.
Si Senining nga nahinabi sa Banat News miingon nga hubog nga nahiabot si Deloso niadtong higayona ug saba kaayo kini gumikan sa hilabihang kalasbag.
Busa iyang gibadlong kay nakatugaw kini sa ilang mga silingan, apan inay mopatuo, nasuko hinuon ug mikuha kini og kutsilyo, busa iya kining giilog ug sa tanto nilang inilogay aksedenting nasamad si Deloso.
Gidala dayon ang biktima ngadto sa tambalanan apan gipapauli ra kini sa mga doktor kay dili man grabe ang samad niini.
Dihang nahuwasan nagkasabot silang magpinasayloay nalang. – Romeo T. Limpangog (BANAT NEWS)