Menor giluba sa karibal

CEBU, Philippines – Nasamdan ang usa ka menor de edad human kini dunggaba sa iyang karibal sa usa ka babayeng ilang uyab didto sa Governor Cuenco Avenue, barangay Banilad ning dakbayan sa Sugbo sa miaging adlaw.

Ang 17 anyos nga biktima, taga sitio Baka, barangay Apas ning dakbayan, samtang ang suspetsado nailhan nga si Abner Aguilon alyas Along, 19, nga taga San Jose L. Briones street, barangay Looc, siyudad sa Mandaue.

Nasayran sa kapolisan nga naglakaw sa karsada ang biktima kauban sa iyang mga higala, dihang giduol kini sa suspetsado ug gikomprontasi bahin sa usa ka babaye nga uyab nilang duha.

Nataymingan usab nga miabot ang maong babaye, unya gisukit dayon sa suspetsado kun kinsay gihigugmang tinuod sa babaye tali kaniya ug sa biktima, apan ang gitudlo sa babaye nga tinuod niyang gihigugma mao ang biktima.

Gumikan sa pagsilaob sa kapungot sa suspetsado milanit kini sa iyang kutsilyo ug gihansakan dayon sa walang kilid ang biktima dayong dagan pahilayo sa maong dapit. – Lesley Caminade (BANAT NEWS)