Driver giulo pagpusil

CEBU, Philippines – Namatay ang usa ka jeepney driver human giulo pagpusil sa gituohang kauban ra usab nga drayber nga iyang gikaaway sa miaging semana sa dalan Magallanes barangay Ermita pasado alas otso sa gabii sa miaging adlaw.

Ang drayber nailhan nga si Pio Rosario Verano, 32, sa sitio Upper Torre sa barangay Inayawan samtang ang lalaki gihulagway lang nga nagsul-ob og t-shirt nga pula nga nag-shorts. Sa pasiunang imbestigasyon sa kapolisan nasayran base usab sa gisaysay sa kundoktor sa biktima nga si Lowel Cañedo Ponsica,19, mihunong sila sa nahisgutang lugar tungod sa red light.

Dihang sa kalit lang usa ka wala mailhing lalaki ang iyang nakitang miduol sa ilang jeepney ug nagpakaaron-ingnong nanawag og mga pasahero.

Hinungdan nga gibaliwala kini niya apan kalit lang nakadungog siya og usa ka buto sa armas ug mao nalay iyang nakita nga ang maong lalaki mikaratil og dagan palayo sa ilang nahimutangan.

Gisuwayan unta sa konduktor paggukod ang maong lalaki apan iyang nakita nga aduna pa kini gibitbit nga armas hinungdan nga iya nalang nga gibalikan ang biktima kinsa nagkadugo na ang likod nga bahin sa ulo.

Ang mga sakop sa Emergency Rescue Unit Foundation (ERUF) nga miabot sa dapit mao nay midala sa biktima diha sa Cebu City Medical Center apan pipila ka oras ang milabay nakabsan gyud kini sa iyang kinabuhi. Matud pa ni PO3 Geoffrey Gutual sa Cebu City Police Office homicide section sa pakighinabi sa Banat News nga base sa gibutyag sa kundoktor diha kanila nakakita og away ang biktima sa laing drayber gumikan sa giingong panag-ilogay nila og pasahero. – Lesley Caminade (BANAT NEWS)