Motor na-slide tungod sa uwan, sakay patay

CEBU, Philippines – Usa ang patay samtang usa ang naangol dihang misampak sa usa ka punoan sa kahoy ang usa ka motorsiklo diha sa sitio Tamiya barangay Basak dakbayan sa Lapulapu kagahapon sa kaadlawon.

Ang biktima mao si Amer Gaviola Candelaza, 36, residente sa sitio Buyong sa Maribago dakbayan sa Lapulapu ug lumad sa Carmen, Ozamis City ug maoy nagdala sa motorsiklo uban sa silingang si Arnold Rivera, 37.

Sa imbestigasyon ni SPO1 Roel Nalzaro sa traffic division sa kapolisan sa dakbayan sa Lapulapu nasuta nga nagsubay ang duha sa dalan Maximo Patalinghug  Ave. pauli sa ilang panimalay mga alas 12:25 kagahapon sa kaadlawon.

Pag-abot nila sa maong dapit kalit nga misarasay sa dalan ang motorsiklo dihang nawad-an og kontrol sa manobela si Candelaza  gumikan sa kadangog sa dalan bunga sa pag-ulan-ulan.

Gikatahong natumba ang duha ug nalagpot si Candelaza sa kahoy sa Mahogani ug gumikan sa kakusog sa pagkaigo sa ulo niini miresulta kini sa iyang kamatayon, samtang si Rivera nakahiagum lamang og mga samad ug bun-og sa kalawasan.

Ang duha gidala sa tambalanan apan gideklarar nga patay na si Candelaza samtang si Rivera luwas na kini sa makuyaw nga kahimtang.

Gumikan sa pagpunay karon og uwan gipahimangnoan sa kapolisan ang mga motorista nga mag-amping pagpadagan sa mga gimanehong mga sakyanan.

Kahinumduman nga sa milabay’ng semana usa ka Engr. Roque Ancahas III, residente sa dakbayan sa Lapulapu nakabsan usab sa iyang kinabuhi human   mabangga ang gimanehong motorsiklo sa usa ka poste. – Bong Soriano (BANAT NEWS)