Balbakwahan sa Ramos papahawaon

CEBU, Philippines – Gitagalan na lang kutob karong adlawa ang mga naninda og balbakwa ingon man sa mga painitan diha sa kilid sa Ramos Public Market ning siyudad sa Sugbu.

Kini tungod kay ang dul-an sa napulo ka mga vendors gihinginlan na ug gimanduang pabalhinon diha sa nahisgutang merkado publiko.

Matud pa ni City Market Administrator Racquel Bohol-Arce nga ila nang gipasidan-an ang mga vendors nga boluntaryong moguba sa ilang mga estraktura.

Kini tungod kay kung magmagahi ang mga manindahay pagbiya sa ilang pwesto sila maoy mo-demolish niini ugmang adlawa.

“Mapugos gyud mi ana pagguba ugma kung dili sila mobalhin, unya dili na hinuon sila nato mahatagan og relocation site,” sumala ni Arce.

Ang mga opisyal mismo sa barangay Cogon-Ramos giingong maoy nangusog nga mapahawa na ang nahisgutang mga vendors tungod kay ang luna nga giukupahan gamiton na sa barangay alang sa ilang nahuna-hunaang proyekto.

Nasayran nga ang maong luna gipanag-iya sa kagamhanan sa dakbayan apan kini giingong ipagamit una sa nahisgutang barangay.

Nagkanayon si Arce nga wala nay rason nga moinsister ang mga vendors pagpabilin sa ilang pwesto tungod kay kini dugay na nilang gipasidan-an.

“Taas kaayo nga panahon atong gihatag nga lugway ana nila and I hope nga mohinay-hinay na sila pagpanghipos unya sa Domingo (karong adlawa),” matud pa ni Arce.

Nasayran nga ang nahisgutang mga vendors makapila na pabalhina sukad gitukod ang bag-ong building sa Ramos Public Market.

Niining higayuna, ang maong mga manindahay gihatagan na og pwesto nga makapaninda sulod sa nahisgutang merkado publiko. – BANAT NEWS