...Laing motor misampak sa laing motor 1 patay

CEBU, Philippines – Usa ang patay ug tulo ang naangol apil na ang usa ka seaman sa panagbangga sa duha ka nagkasugat nga motorsiklo sa barangay Aliwanay lungsod sa Balamban niadtong Huwebes sa alas 10:45 sa gabii.

Ang namatay mao ang drayber sa motorsiklong si Arnold Candia Crausos, 24, molupyo sa barangay Pundol sa maong lungsod samtang ang laing naangol mao ang iyang angkas nga si Pablito Armas, molupyo ra sa nahisgutang lugar.

Samtang ang ilang gikabangga nga pulos usab naangol mao si Eduardo Jusay Jr, 39, taga Mainggit siyudad sa Toledo nga usa ka seaman ug maoy nagmaneho sa motorsiklo, ug ang usa ka lumalabay nga si Jadel Alegato, 26, molupyo ra sa maong lugar nga naglakaw lang sa dalan ug nasaghiran sa nagkabanggang motorsiklo.

Matud pa ni PO2 Cesar Climaco sa Balamban Police dihang nahinabi sa Banat News si Jusay paingon nang mopauli sa siyudad sa Toledo gikan nga nibisita sa iyang mga amigo sa barangay Baliwagan sa Balamban.

Apan pag-abot niini sa maong lugar iyahang gikasugat ang laing motorsiklo nga gisakyan nila ni Crausos ug Armas, giingong pulos kusog ang pagpadagan sa duha ka motorsiklo niadtong tungura.

Pag-abot sa maong dapit nagsampok sila sa tungang bahin sa karsada ug tungod sa kakusog sa impact nalamba sila si Crausos samtang nalabay sab sa daplin sa karsada ang motor nga gisakyan sa seaman ug naigo si Alegato diha sa daplin.

Ang mga polis na maoy mitabang sa mga biktima paghatud kanila sa Balamban District Hospital apan gideklarar nga dead on arrival si Crausos samtang gibalhin sa tambalanan dinhi sa siyudad sa Sugbo ang angkas niining si Armas.

Si Jusay ug Alegato nakaangkon lang og gamay’ng kadaut sa lawas. Gisusi pa sa kapolisan kung si kinsay sad-an sa maong hitabo. – Darrel Carumba (BANAT NEWS)