P100 milyones paghipos sa basura

CEBU, Philippines – Gumikan sa nakitang problema unya sa umaabot nga panahon mugna sa polusyon ug basura, mogahin ang kagamhanan sa lalawigan sa Sugbu og P100 milyones alang sa pagprotektar   sa kalikupan pinaagi sa saktong pamaagi sa paghipos sa basura.

Si Governor Gwendolyn Garcia nagkanayon nga ang maong gahin gihatag ni Presidente Gloria Arroyo alang sa simulated program sa hiniusang paghipos sa mga basura gikan na sa mga kabarangayan ngadto na sa kalungsuran nga gitawag og Disposal of Waste Improvement pinasikad sa RA 1903.

Ang maong gahin gamiton alang sa recycling sa mga basura aron usab makwartahan sa mga residente ang ilang mga basura.

Si Provincial Planning and Development Office head, Engr. Adulfo Queroga nagkanayon nga sa maong programa, ang mga barangay officials gitahasan pagtukod og recovery compose pit sa ilang mga barangay.

Kini maglambigit gihapon sa paglain sa malata ug di malata nga basura ug kadtong mga ma-recycle pa nga basura.

Buot ni Garcia nga gahinan og tag P50 mil ang matag barangay sa lalawigan aron gamitong puhunan sa pagpalit sa mga recyclable materials gikan sa mga residente niini.

Samtang ang mga siyudad ug lungsod sa probinsiya maoy motigom sa recyclable materials gikan sa mga barangay ug ang probinsiya usab mao ang mopalit niini aron ibaligya na ngadto sa mga kompanya nga mopalit og mga lata, plastic, puthaw ug uban pa.

Si Quiroga nagkanayon nga Hunyo 28 ning tuiga ang gobernadora mosusi sa mga Recyclable Recovery Facilities sa kabarangayan sa dili pa hingpit nga ma-release ang pundo.

Ang gobernadora mitataw sa maong programa nga maka-negosyo ang katawhan apil na ang mga opisyales sa barangay ug kalungsuran ug malimpyo pa ang kalikupan kay ning paagiha dili na man magpasagad sa paglabay sa basura ang mga tawo. – BANAT NEWS