Hapon, magtiayon sikop sa pamaligya pekeng US$

CEBU, Philippines – Usa ka Hapon ug duha ka magtiayon nasikop atol sa entrapment operation sa kapolisan sa dakbayan sa Lapulapu gumikan sa pagpamaligya og mga pekeng dolyares sa milabay'ng hapon sa usa ka department store sa maong dakbayan.

Ang nasikop mao si Nakaya Takashi, 60, usa ka Japanese ug kasamtangang nagpuyo sa Banawa, Barangay Guadalupe, dakbayan sa Sugbo.

 Samtang lakip sa gisikop mao ang magtiayong Rudy Espinosa Ybañez, 68 ug Gloria Uy Ybañez, 62, mga residente sa sitio Upper, barangay Jagobiao dakbayan sa Mandaue.

Matud pa ni Supt. Mariano Natu-el Jr., officer-in-charge sa Lapulapu City Police Office nga maoy nangulo sa maong entrapment operation nasayran nga sa milabay'ng Lunes usa ka impormante miduol sa ilang buhatan ug mipahibalo nga dunay usa ka Hapon nga namaligya og pekeng dolyares sa ubos kaayo nga presyo.

Ang matag 100 dolyares paliton kini sa balor nga P1,300 ngadto sa P1,500   apan kun dinagkong kantidad na kini ibaligya lamang sa Hapon og usa ka libo matag 100 dolyares.

Gumikan niini, nagduda si Sr. Supt. Natu-el nga peke ang maong mga dolyares hinungdan sa iyang paghimo og entrapment operation sa maong Hapon pinaagi sa pakigsabot nga sila mopalit balor 16,000 dollars sa kantidad lamang og P30,000.

Sa dihang gikatakda ang pinalitay sa milabay'ng gabii sulod sa Chowking sa Gaisano Mactan, dakbayan sa Lapulapu ug sa dihang nakita ni Takashi ang kwarta nga dala sa decoy sa kapolisan dali kining mikuha sa iyang kwartang dolyares sa awto sa magtiayong Ybañez ug gihatag ngadto sa decoy ang 103 ka 100 dollars dayong sikop ni Takashi lakip na ang magtiayong Ybañez.

Matud pa ni Natu-el gumikan sa pakigkunsabo sa magtiayong Ybañez ngadto sa Hapon maoy hinungdan nga giapil kini sa pagsikop ug pasakaan og kaso.

Ang magtiayong Ybañez ug si Takashi   nagdumili sa paghatag og pamahayag gumikan kay ila pang gipaabot ang ilang abogado. Apan si   Gloria Ybañez mipadayag nga wala silay kasayuran sa maong kaso nga ilang gikalambigitan. – Bong Soriano (BANAT NEWS)