APlus kuhaon gyud sa CH

CEBU, Philippines – Desidido ang kagamhanan sa dakbayan sa Sugbo pagkuha sa serbisyo sa laing towing services nga motabang pagpatuman sa towing ordinance sa siyudad.

Gipadalhan na og suwat sa City Traffic Operations and Management (Citom) ang A Plus Towing Services alang sa pagsubmiter sa mga rekisitos niini.

Kini human usab mitanyag ang nahisgutang towing services sa ilang serbisyo ug interesadong mosulod og kontrata tali sa siyudad.

Matud ni Citom executive director Arnel Tancinco nga lakip sa ilang gipangayo sa A Plus mao ang property damage insurance niini ug ang ilang conformity sa sharing scheme.

Nasayran nga ang Road Warrior ug One Stop Towing Services mihatag og 15 porsyento nga bahin sa kita sa makolektang multa niadtong ma-tow nga mga sakyanan ngadto sa dakbayan.

Giklaro hinuon sa Citom executive director nga ang kontrata nga pirmahan sa A Plus Towing Services mag-agi una sa pag-aprobar sa City Council.

Midugang si Tancinco nga dili pa papirmahon og kontrata ang nahisgutang towing services ipaubos usab sa inspeksyon ang mga sakyanan niini.

Una nang gipadayag ni Mayor Tomas Osmeña nga nanginahanglan og dugang towing services ang siyudad alang sa hingpit nga pagpatuman sa towing ordinance sa dakbayan.

Kini samtang gikwestyon ang implementasyon sa nahisgutang ordinansa ug sa paghatag sa siyudad og provisional authority sa operasyon sa One Stop Towing Services.

Ang kagawad sa Tinago nga si Joel Garganera nga usa usab sa mga kritiko ni Osmeña maoy nangusog pagkwestyon sa implementasyon sa towing ordinance. – Elly Bolonos (BANAT NEWS)