CEBU, Philippines – Gihagit og debate ni Anad Partylist Rep. Pastor “Jun” Alcover ang mga supak sa constituent assembly (con-ass) sa lakang nga planong pag-amendar sa konstitusyon ilabina gyud ang mga militanteng pundok nga maoy nagpasiugda sa walay hunong nga mga lihok protesta. Gipadayag ni Alcover dihang nahinabi sa Banat News nga gusto lang niyang hatagan og katin-awan ang publiko nga silang mibotar pabor sa House Bill 1109 wala magtago human kini mapasar.
Gipasanginlan hinuon ni Alcover ang mga militanteng pundok ug pipila sa kaubanang partilista sa Kongreso sama sa Bagong Alyansang Makabayan Bayan, Gabriela, Anak Pawis ug uban pa nga mi-divert lang sa isyu tungod kanunay lang nilang ipahid ang tanang pasangil ngadto sa administrasyon ni Presidente Gloria Arroyo.
Matud pa ni Alcover natabunan na hinoon ang tinuoray nga isyu pagtuki kun makaayo ba o dili ang planong pag-amendar sa Batakang Balaod.
Hinuon wala balibari ug gidawat sab dayun sa Bayan Muna Partylist ang maong hagit, ang chairman sa Bayan Muna Central Visayas nga si Paul Rodriguez dihang nahinabi sa Banat News miingon nga wa sila mahadlok og debate ni Alcover kalabot sa isyu.
Giawhag ni Rodriguez ang Kapisanan ng mga Broadkaster sa Pilipinas KBP-Cebu Chapter nga maoy mopasiugda sa debate nila ni Alcover.
Nisumbalik hinoon og pasangil si Rodriguez ngadto kang Alcover nga gihulagway niya nga usa lang sa daghang kongresistang nagpagamit ug gigawongan sa Malacañang.
Matud ni Rodriguez nga dili gyud kalikayan nga maapil si Arroyo sa mga protesta tungod kay alang nila kini man maoy utok niining tanan tungod kay kini ang makabenepisyo sa higayun nga molampus pag-amendar sa konstitusyon aron malugwayan pa ang termino niini ug walay eleksyong mahitabo sunod tuig. – Darrel Carumba (BANAT NEWS)