Mga kawani sa PPC nag-noise barrage
CEBU, Philippines – Giprotestahan sa mga kawani sa Philippine Postal Corporation ang ilang labaw nga opisyal tungod sa kapakyas sa paghatag sa ilang mga benepisyo.
Milusad og noise barrage ang mga miyembro sa PhilPost Employees Union of the Philippines atubangan sa ilang buhatan aron mapalanog ang ilang gipangayong benepisyo.
Si Rey Suelto, ang area vice chairman sa Visayas Philpost Employees Union mitug-an nga wala mahatag ang ilang gipangayong remittance sa Pag-ibig, Phil Health, ilang bonus, clothing allowance ug uban pa.
Nalakip usab sa ilang gipangayo nga ibalik sa paghatag ang ilang productivity incentives bonus nga giputol niadto pang tuig 2006 nga hangtud karon wala pa gihapon gibalik.
Matud pa ni Suelto nga gawas sa noise barrage, mopahigayon usab sila og vigil diha sa ilang buhatan aron siguradong madungog sa gobiyerno ang ilang gipangayong benepisyo.
Gipadayag usab nila ang ilang dakong kasagmuyo sa ilang Post Master General nga si Oscar Villanueva tungod kay wala kini mitabang sa ilang gipangayo ug gipasagdan na lamang silang nagpadayag sa ilang hangyo ngadto sa ulohang buhatan.
Gipasalig hinuon nila nga dili maapektohan ang ilang pagpanghatud sa sulat ngadto sa publiko dinhi sa siyudad ug sa lalawigan sa Sugbu. – Chester Abadilla (BANAT NEWS)
- Latest
- Trending
