Ex-police nagwara-wara'g pinuti gipusil

CEBU, Philippines – Kanhi police nga nag-amok nagdalag pinuti, indian pana ug ice pick napusilan sa mga sakop sa kapulisan sa lungsod sa Carcar diha sa San Vicente St., barangay Poblacion 1 sa nahisgutang lugar niadtong Miyerkules sa gabii.

Ang nalandig sa Vicente Sotto Memorial Medical Center giila sa kapulisan nga si Felino Amistad Jr. kanhi police nagpuyo sa sitio Dapdap, barangay Poblacion III sa nahisgutang lugar.

Si Amistad nakaangkon og samad pinusilan sa iyang walang paa ug tuong batiis human pusila ni SPO1 Meliton Agadier Jr. sa Carcar police station. Si SPO1 Agadier nga gikahinabi sa Banat News nagkanayon nga unang gihasi ni Amistad ang mga batan-on duol sa gym sa nahisgutang barangay pinaagi sa pagsige’g hulbot-hulbot sa iyang gidalang pinuti.

Gikatahong nagpurong si Amistad og puwa, nagsul-ob og camouflage ug nag-shorts niadtong tungura hinungdan nga nagpatabang ang mga batan-on sa kapolisan.

Sumala pa ni Agadier base sa gitug-an sa mga batan-on gikatahong gipangita ni Amistad si Mayor Patrick Barcenas ug giingong gipangutana pa niini ang mga dancer sa plaza nga nag-practice kun wala bay patay.

Human nga mi-report sa mga polis ang mga batan-on giadto nila si Amistad nga anha magpundo gibana-banang 100 metros gikan sa police station.

Sila si PO2 Abay-Abay ug PO2 Paulino Sanchez Jr. maoy unang miduol ni Amistad ug gihangyong ipabutang ang pinuti sa yuta apan giingong wala kini mopatuo ug mibunot pa hinuon niini dungan sa pag-siyagit nga “patya ko ninyo kay patay ang akong tuyo!”

Si SPO1 Agadier kinsa diha sa pikas kilid sa akusado misuway unta pagduol kaniya ug mihangyong motahan nalang kini apan gikatahong gidagan ug giwara-warahan niini sa pinuti si Agadier hinungdan gipusil kini ni Agadier sa tiil tulo ka higayon apan duha ra ka bala ang miigo sa iyang walang paa ug tuong batiis.

Nagduda si Agadier nga nalisoan sa pangisip si Amistad. Sumala pa niya nga kini taud-taud nang naghambin sa deperensya sa pangisip ug kaniadto gipabalik kini sa Regional Training School human maka-take oath sa pagka-polis.

Ang akusado kasamtangan karong nagpaalim sa tambalanan sa Vicente Sotto Memorial Medical Center. – BANAT NEWS