Anti-constituent assembly rally sa Cebu 'peaceful'

CEBU, Philippines – Kapin sa 500 lamang ka mga militanting pundok ang nangapil sa protesta pagsupak sa pag-amendar sa Batakang Balaod pinaagi sa Constituent Assembly.

Nag-martsa ang mga raliyista mga alas 9 sa buntag gikan sa Fuente Osmeña paingon sa dalan Colon lahos ngadto sa Malacañang sa Sugbo diin mga polis ug mga trak sa bombero ang nagpaabot kanila.

Si Fr. Max Abalos nga usa sa mga lider sa nagkadaiyang sektor nagkanayon nga giluiban sa mga kongresista ang mga Sugbuanon pagduso sa Constituent Assembly isip paagi pag-usab sa Konstitusyon.

Gihulagway hinuon sa kapolisan nga malinawon ang gipahigayong rally tungod kay walay mga dautang panghitabo kagahapon.

Si Sr. Supt. Patrocinio Comendador nagkanayon nga wala makasugat og suliran ang kapolisan atol sa ilang pagbantay sa kahusay ug kalinaw atol sa martsa protesta sa nagkadaiyang sektor.

Si Arman Perez, secretary general sa Bayan Muna Central Visayas mipadayag nga opening salvo lang ang ilang paghimo og rally alang sa mas halapad pa nga mga protesta sa Hunyo 12 nga state of the nation address (SONA) ni Pres. Gloria Macapagal-Arroyo. - Guam Logroño (BANAT NEWS)