CEBU, Philippines – Tun-an sa Cebu City Disaster Coordinating Council (CCDCC) ang kamatuoran sa taho nga ang mga kolor itom nga mga sapot o sinina maoy paboritong tugpahan sa mga lamok nga nagdala sa sakit nga dengue.
Kini maoy gipadayag ni Konsehal Gerardo Carillo nga maoy tsirman sa CCDCC nga mikutlo sa pamahayag ni Health Secretary Francisco Duque III.
Si Duque namahayag nga dali ra nga maibog sa itom, blue ug ubang ngitngit nga kolor ang “aedes aegypti”, ang lamok nga nagdala sa makamatay nga dengue virus.
Wala hinuon tin-awa sa health secretary kung unsa ang iyang gibasehan niini hinungdan nga dunay panagana usab niini si Carillo.
Gitataw hinuon sa konsehal nga ila usab dayong sagupon ang pamahayag ni Duque kung kini adunay igong basehanan.
Kini pinaagi usab sa pag-awhag sa mga tunghaan nga dili pasul-ubon ang mga tinun-an og kolor itom ug ubang dark color.
Apan gitataw ni Carillo nga mas maayong manglimpyo kanunay ang mga tunghaan og diha sa matag pinuy-anan aron malikayan ang nahisgutang sakit.
Ang pagyabo sa mga napundong tubig gikinahanglan kaayo aron kawad-an og itloganan ang mga lamok nga maoy nagdala sa dengue.
Sa sayo pa gibutyag ni Mayor Tomas Osmeña nga siya wala matagbaw sa anti-dengue campaign sa siyudad bisan pa man kung miminos na ang mga kaso niini karong tuiga. Kini tungod kay duna gihapoy nangamatay sa nahisgutang sakit dinhi sa dakbayan sukad sa buwan sa Enero hangtud niadtong miaging buwan. - Elly Bolonos (BANAT NEWS)