CEBU, Philippines – Usa ka bayot nga trabahante og inilang kompaniya sa Sugbo mipasangil sa iyang gikadulog nga lalaki nga kakunsabo sa mga tulisan nga mitulis kaniya samtang nag-okupar og kuwarto sa usa ka lodging house sa Juana Osmeña Extension, ning dakbayan kagahapon sa kaadlawon.
Ang bayot nga nagpaila lamang sa kapolisan sa Fuente Osmeña Police Station nga si “Babie” mipadakop sa iyang gikadulog sa lodging house nga si Romeo Llanes, hingkod ang panuigon, residente sa sitio Tinabangay-Alaska, barangay Mambaling ning dakbayan.
Sumala pa sa imbestigasyon sa kapolisan sa Fuente nga si Babie ug si Llanes nagkasabot nga magkuyog sa pag-check in sa lodging house.Nagkasinabot usab sila nga si Llanes bayran og P300 alang sa hamubo nga kalipay.
Apan sa dihang nagdulog na sila sulod sa lawak sa lodging house nga gi-okupahan ni Babie, kalit lang nangabot ang duha ka wala mailhing lalaki nga ang usa kanila armado og pistola.
Gipanguha sa mga tulisan ang i-pod nga nagkantidad og P10 mil, relo de pulso nga P6 mil ug P2,400 nga kuwarta gikan ni Babie.
Si Llanes gidakop sa mga polis sa Fuente Osmeña samtang nagbarugbarog atubangan sa usa ka gasoline station sa dalan Juana Osmeña uban sa mga babaye, sa dihang si Babie midangop kanila ug nagpatabang nga dakpon ang lalaki.
Apan si Llanes mihimakak sa pasangil ni Babie.
Gisumbalik hinuon ni Llanes og reklamo ang mahuyang nga iyang gikadulog tungod kay matud niya wala siya bayri sa P300 nga gisaad niining ibayad alang sa hamubong kalipay.
Sumala pa ni Llanes nga gidagit siya sa mga tulisan ug didto na gibilin sa dalan Panganiban, barangay Pahina-Central ning dakbayan.
“Wala ko makaila atong mga tulisan sir, gani biktima pud ko ato nila kay gidala man ko nila. Didto nako gibuhian sa may Panganiban kay wala silay nakuha nako. Kun kunsabo pa mi nila dili unta ko mobalik sa akong puwesto sa Juana Osmeña,” si Llanes miasoy ngadto sa mga polis.
Si Llanes nagplanong mopasaka og kaso batok kang Babie tungod sa kapakyas niini pagbayad sa P300 nga gisaad niining bayad kaniya.
“May na lang unta to magamit to nako ang P300,” si Llanes miingon.
Bisan sa iyang panghimakak, si SPO2 Justo Gabuya miingon sa dihang nahinabi sa Banat News nga si Llanes gitanggong gihapon sa karsel sa Fuente Osmeña Police Station samtang gipaabot ang imbestigasyon ug posibleng mapasakaan og kasong pagpanulis uban sa duha ka wala mailhing lalaki. – BANAT NEWS