Mipusil sa polis wa pa dakpi

CEBU, Philippines – Kapolisan sa dakbayan sa Talisay padayon pa pagpangita sa giingong ex-convict nga mipatay kang PO2 Benjamin Racaza, polis nga nadestino sa Regional Human Resource Development Division sa Police Regional Office (PRO-7) niadtong Sabado sa gabii.

Hangtod ning pagsulat sa balita wala pay kasong nasang-at batok sa suspek nga si Anthony “Tonton” Aves tungod kay nagpadayon pa ang hot pursuit operation pagpangita sa naulahi, apan kun di gyud kini madakpan sulod ning semanaha isang-at gihapon nila ang kaso.

Sumala pa ni Supt. Henry Biñas, hepe sa kapolisan sa Talisay City Police Station sa pagkihinabi niini sa Banat News nagpatabang na sila sa ubang mga police units sa rehiyon kabahin niini.

Duna nay giluwatang affidavits ang duha ka mga saksi batok sa suspek kinsa diha gyud atubangan sa biktima dihang kini gipusil ni Aves.

Si Racaza nakaangkon og usa ka samad pinusilan sa walang bahin sa tampihak ug ang bala ang milahos sa walang aping, nakabsan siya sa kinabuhi diha na sa Chong Hua Hospital nianang Domingo sa buntag.

Ang kapolisan hangtud ning pagsulat sa balita wala pay nakuhang klarong motibo sa pagpatay ni Aves sa maong police. - Brenda D. Batuto (BANAT NEWS)