Drayber giligid og panigbas

CEBU, Philippines – Nabulit sa samad ang paa ug bukton sa usa ka drayber sa traysikad dihang giligid kini og tigbas sa usa ka hubog nga mananagat didto sa Sitio Suba, barangay Poblacion lungsod sa Dalaguete niadtong Lunes sa alas 9:00 sa gabii.

Ang biktima mao si Jose Sandoval Gamboa, 40, minyo, nga taga Sitio Sulong-on, barangay Tapon, sa maong lungsod , samtang ang suspek nailhan usab nga si Ronelo Bacus Olbido, 38 , minyo, ug usa ka mananagat nga silingan ra sa biktima.

Si PO3 Domino Ravanes, sa Dalaguete Police Station mibutyag sa Banat News nga ang biktima kinsa lapoy kaayo ang lawas sa kinayod sa iyang traysikad, nahinanok sa pagkatulog sulod sa iyang sakyanan nga iyang giparking tungod sa usa ka hayag nga poste sa kuryente dihang naagian kini sa usa ka lasbag nga mananagat ug sa walay daghang langas gihabas og panigbas ang biktima.

Nakapabor sa pagpanigbas ang suspetsado kay wala kapanagang ang biktima gumikan sa pagkahinanok niini.

Maayo nalang kay wala kini uloha o lioga sa pagtigbas, kay sa paa ra ug sa iyang mga bukton ang may mga samad tinigbasan.

Pagkamatngon niini nga may mga estambay nga nakakita sa iyang gibuhat   ug misinggit kaniya, mikaratel siya og dagan pahilayo hinungdan nga wala niya katiwasi ang biktima.

Ang biktima gihatod dayon ngadto sa Vicente Sotto Memorial Medical Center (VSMMC) sa dakbayan sa Sugbo, samtang ang suspek nadakpan usab dayon sa mirespondeng mga polis ug nagtingkagol na karon sa prisohan sa maong lungsod. - Darrel A. Carumba (BANAT NEWS)