Sikyu giluba sa bayot

CEBU, Philippines – Naangol ang usa ka guwardiya human kini dunggaba sa bayot nga iyang kapuyo didto sa sitio Waling-Waling, barangay Opao, dakbayan sa Mandaue sa miaging kaadlawon.

Ang biktima mao si Carlito Deloso, 25 , ulitawo, nga taga Waling-Waling ug guwardiya sa usa ka establisamento sa Mactan Export Processing Zone (MEPZ) sa barangay Pusok, dakbayan sa Lapulapu.

Samtang ang suspetsado mao si Ereneo Senining Jr., hingkod, nga live-in partner sa biktima.

Si PO3 Manolito Labus sa Presinto 5 sa Opao Police Station miingon nga malagmit nagselos ang suspetsado kay alas 2:00 pasado na sa kaadlawon nahiuli sa ilang balay ang biktima nga maoy hinungdan sa ilang panaglalis.

Dihang misangko na sa mainition kaayo ang ilang lalis milanit og kutsilyo ang suspetsado ug sa walay daghang estorya gihansakan niini ang tiyan sa biktima.

Gidala dayon sa mga silingan ang biktima ngadto sa tambalanan ug ang suspetsado nga nakadunggab gibalhog usab dayon sa bilanggoan. - Romeo T. Limpangog (BANAT NEWS)