Batang suspek sa tulis nga gikulata, gipabuhian

CEBU, Philippines – Gibasura sa piskalya ang kasong pagpangawat nga gipasaka sa kapolisan batok sa usa ka 15-anyos nga batang lalaki kinsa mipasangil usab sa kapolisan nga gikulata sa mga polis nga midakop kaniya.

Si Talisay City Prosecutor Marshal Rubia sa pakighinabi sa Banat News mibutyag nga gi-dismiss niya ang kaso human ang inahan niini nakapakita og birth certificate pagmatuod nga 15-anyos pa ang panuigon sa suspetsado.

Matud ni Rubia nga ubos sa Akta Republika 9344 kon “Juvenile Justice and Welfare Act of 2006” ang 15-anyos paubos exempted sa criminal liability apan ang 15-anyos pataas ang pwede na kining mapasakaan og kaso apan nagkinahanglang nasayod kini kun tinuyoan niya ang iyang gibuhat nga krimen.

Kahinumduman nga ang maong menor ang mipasangil nga gikulata siya sa mga polis nga misikop kaniya ug wala gani siya tugoti nga mopahibawo sa iyang ginikanan nga siya gidakop.

Ang maong menor ang gikatahong gitumbok usab ni Venus Abellana, 21-anyos taga Canton Ville, barangay San Isidro usa ka call center agent nga maoy milabni sa iyang bag nga dunay sulod nga cellphone nga nagkantidad og P9,500, salapi nga P2,300, company ug school ID’s ug mga dokumento niadtong Mayo 25, 2009 mga alas 5:05 sa buntag dihang paingon na unta siyang motrabaho. Kagahapon sa buntag ang menor gitugyan na ngadto sa City Social Welfare ug gitugyan usab kini ni Fe Bacaltos Social Welfare III ngadto sa barangay hall sa San Isidro. - Brenda Batuto (BANAT NEWS)