CEBU, Philippines – Gisugdan na kagahapong adlawa sa kagamhanan sa dakbayan sa Sugbu ang pagpangsira sa mga balay patigayon sa siyudad nga wala mobayad og buhis.
Labing minos upat ka mga establisamento ang gipangkandaduhan kagahapon sa City Hall tungod sa kapakyas pag-renew ingon man sa paglukat og business permits.
Unang gisirad-an sa mga sakop sa Tax Mapping Division mao ang VF Rosevic Enterprises sa dalan T. Padilla Extension nga gipanag-iya ni Vicente Felecia.
Ang nahisgutang establisamento giingong utangan sa kagamhanan sa dakbayan og kapin sa usa ka gatos ka libo ka pesos sa business tax.
Dali hinuong miadto sa City Hall ang representante sa Rosevic Enterprises ug mihatag og P25 mil isip pasiunang bayad sa ilang obligasyon.
Laing gisirad-an sa City Hall kagahapon mao ang tulo ka tindahan og barbecue diha sa Larsian tungod sa kapakyas niini pag-renew sa ilang business permits.
Kini mao ang Bantayan Express, Lito and Mercy ug Leytenian BBQ nga giingong wala mohatag og pagtagad sa gipadalang notisya ngadto kanila.
Nasayran usab sa Banat News nga boluntaryong nanira ang E. Montano Electric Fan Services diha sa dalan T. Padilla human makadawat og notisya.
Matud sa labaw sa Tax Mapping Division nga si Tata Sungahid nga nihatag na usab og partial payment ang tag-iya niini sa ilang buluhisan.
Gipadayag ni Sungahid nga dugang mga balay patigayon sa siyudad ang ilang pangkandaduhan sa mosunod nga mga adlaw kay giingong duna pay dul-an sa napulo nga pending closure orders gawas nga ubay-ubay pa usab ang nagpaabot sa pirma ni Mayor Tomas Osmeña. - Elly Bolonos (BANAT NEWS)