Mga librong dagha'g sayop ipasusi

CEBU, Philippines – Mo-lobby si Kongresista Antonio Cuenco sa habagatang bahin sa dakbayan sa Sugbo sa Kongreso alang sa usa ka imbestigasyon batok sa mga supplier og libro sa mga tinun-an dinhi sa nasud nga dunay daghang sayop ug nakaapektar sa pagtuon sa kabataan.

Si Cuenco mibutyag nga iyahang pakigtagbuan ang chairman sa House Committee on Education alang niini aron manubag kadtong masakpang responsable sa pagpamuhat og mga librong dunay daghang sayop.

Gipalanog kini sa kongresista atol sa gipahigayong ceremonial turnover sa P1.6 milyones nga balor sa mga librong iyang gidonar sa mga tinun-an sa elementarya ug sekondarya sa Labangon niadtong Sabado nga gitambungan sa supplier nga F & J De Jesus incorporated didto sa Daycare Center sa Labangon.

Lakip sa mitambong si Bise Mayor Michael Rama ingon man mga kapitan sa Labangon ug Tisa nga sila si Felix Abella ug Eduardo Cabulao uban sa mga magtutudlo ug prinsipal sa Don Sergio Memorial National High School ug Tisa National High School. Ang maong mga libro gipalit gamit ang Countrywide Development Fund isip kabahin sa gilusad niyang programa sa pagpalig-on sa edukasyon sa kabataan sama sa comprehensive reading.

Si Kapitan Abella mihangop sa maong donasyon ug nagtuong makatabang kini og daku sa pagtungha sa mga tinun-an sa publikong tunghaan. - Darrel Carumba (BANAT NEWS)