Polis giulo pagpusil

CEBU, Philippines - Namatay kagahapon pasado alas 9:00 sa buntag ang polis nga si PO2 Benjamin Racaza human pusila sa silingang ex-convict sa wala pa mahibaw-ing hinungdan niadtong Sabado sa gabii diha sa garahian sa balay sa biktima sa sitio Litmon, barangay Dumlog dakbayan sa Talisay.

Si Racaza nadestino sa Regional Human Resource Development Division sa Police Regional Office (PRO)-7 nakaangkon og usa ka samad pinusilan sa tuong tampihak ug ang bala milahos sa walang aping.

Dali siyang gidala sa Talisay City District Hospital ug gibalhin sa Chong Hua Hospital apan nakabsan gyud kini sa kinabuhi kagahapon sa buntag.

Ang suspetsado giila sa mga polis nga si Anthony Aves alyas “Tonton”, 23-anyos lumad nga taga barangay Carreta, dakbayan sa Sugbo kinsa daling miikyas ug padayon pang gipangita sa mga polis.

Si Supt. Henry Biñas, hepe sa kapolisan sa Talisay City Police Station sa pakighinabi niini sa Banat News kagahapon mibutyag nga si Aves napriso diha sa Cebu Provincial Jail sulod sa lima ka tuig dihang nagpanuigon pa kini og 15-anyos tungod sa kasong pagpatay.

Matud pa ni Biñas nga nawagtang usab ang 9mm pistol service firearm ni Racaza, apan gikatahong duha ang armas niini diin ang usa lisensyadong .45 ug gisusi pa gyud og mayo asa sa duha maoy nadala sa suspek.

Si Jerry Entoma, 26-anyos nga bayaw ni Aves ug handler sa mga manok ni Racaza mibutyag sa Banat News nga init gyud og ulo ang suspek ilabi na kun makainom.

Gikatahong miduol si Aves sa balay nila ni Racaza ug gihaylo ang polis nga ipapalit ang iyang manok og P250 matag usa ug pakapinan pa og iyang bantam.

Wala pa gani makaestorya ang polis mibiya na si Aves ug gikuha ang bantam niining manok apan samtang gitan-aw ni Racaza ang manok kalit nga gipusil ni Aves ang tampihak sa biktima.

Sumala pang Entoma naugbok ang ulo sa maong polis diha sa yuta human sa pagpusil. Si Entoma ug ang silingang si Talon Cejas nga diha sa pagkahitabo daling nanago.

Si Aves yanong milakaw apan dangtan pila ka gutlo mibalik kini ug nadunggan nilang misulti og “patay na, patay na na siya” ug dayon milakaw. Ang duha nangayo dayon og tabang sa mga silingan.

Na-recover sa mga polis gikan sa crime scene ang usa ka kabhang sa bala sa kalibre .45 nga pistola. – BANAT NEWS