Batang suspek sa tulis 'gikulata' sa mga polis

CEBU, Philippines - Usa ka menor de edad kinsa gipasanginlang nanulis og cellphone sa laing menor de edad namasangil nga gikulata sa mga polis nga midakop kaniya.

Kahinumduman nga usa ka menor de edad nga drayber og traysikad nga taga sitio Tiago ang nangayo tabang sa mga polis niadtong Biyernes sa hapon tungod kay gitulis siya diha sa Tabunok ug nakuha ang iyang 3310 nga cellphone.

Niadtong Sabado sa kaadlawon tulo ka mga batan-on ang nadakpan sa kapolisan nga pulos nakahimo og salaud, ang usa ka sakop sa Alpha Kappa Rho nga nagbitbit og armas nga si Miko Taguera ug ang duha mga menor de edad sa managlahing dapit sa Talisay.

Si Taguera una nang gitumbok sa kapolisan nga responsable sa pagpangawat ug gituuhang manulis usab dihang naatlang nagbitbit sa armas diha sa Carmen Ville sa barangay Poblacion, siya maoy unang nasaypang gitudlo sa batang 16-anyos, biktima sa tulis niadtong Biyernes diha sa Tabunok.

Apan nasuta nga ang laing 16-anyos diay nga kadungan ni Taguera pagkadakop mao gyu'y mitulis sa maong batan-on, ug karon maoy mireklamong gikulata sa mga polis.

Ang maong 16-anyos nga gipasanginlang mitulis sa batan-on mipakita ngadto sa mga tigbalita sa iyang mga bun-og sa kalawasan, nawong, bitiis ug tiil nga giingong gibunalan og batota.

Ang maong menor dihang nahinabi sa mga tigbalita mihimakak sa tanang pasangil kaniya.

Ang inahan sa suspek nga menor de edad nga gikahinabi sa mga tigbalita nagkanayon nga dili “tulis” ang nahitabo kundili “kawat” ug ang iyang anak gi-pickup lang sa mga polis nga wala gani mopahibawo kaniya.

Kagahapon si Rabaya ang mipakita ngadto sa mga tigbalita sa baptismal certificate sa iyang anak pagmatuod nga 16-anyos pa.

Si Rabaya mibahad siyang mopasaka og kasong administratiba ug kriminal batok sa mga polis nga midakop og mikulata sa iyang anak.

Si Supt. Henry Biñas sa pakighinabi sa mga tigbalita nagkanayon nga dihang nadakpan ang maong bata kini nangangkon 18-anyos na ang edad ug kini miangkong sakop sa Akhro ug nalambigit sa nahitabong tulis niadtong Mayo 24, 2009 diha sa lansiyawan sa sitio Nonoc, barangay Tabunok.

Apan wala mausab ang baruganan ni Biñas nga mao gyud kini ang mitulis sa cellphone sa menor de edad ug ipadayon nila ang kiha batok sa maong bata. – BANAT NEWS