CEBU, Philippines – Patay ang usa ka mananagat ug tulo ang naangol apil na ang usa ka magtutudlo sa panagbangga sa duha ka motorsiklo sa usa ka kurbadahong dalan sa barangay Ocoy lungsod sa Sta. Fe sa isla sa Bantayan niadtong Huwebes sa alas 7:00 sa gabii.
Ang namatay mao si Deto Negrido Samson, molupyo sa nahisgutang lugar samtang ang naangol mao ang drayber sa motorsiklong gisakyan nga si Fruto Desabille, 50.
Samtang nangaangol usab ang mga sakay sa gikabanggang motorsiklo nga mao ang magtiayong Ted Daang Pascual, 27, ug ang asawang magtutudlo sa elementarya nga si Marilou Pascual.
Matud pa ni PO1 Melchor Mangumpit sa Sta. Fe police dihang nahinabi sa Banat News gikan sa barangay Ocoy si Samson ug Desabille padulong sa barangay Talisay niadtong tungora.
Samtang gikasugat niini ang managtiayon sa pikas lane, sumala pa sa kapolisan pag-abot sa kurbadahong bahin sa nahisgutang lugar gikatahong wala momenor si Desabille pagpadagan hinungdan nga mikawat kini sa pikas nga lane.
Gumikan niini gikatahong nawad-an siya og control ug mi-zigzag hangtud nga misampak sa motorsiklo sa managtiayon nga ilang gikasugat hinungdan sa pagkalagpot sa tanang sakay sa duha ka motor.
Ang mga tawo diha sa lugar mao nay mihatod sa mga biktima sa Bantayan District Hospital apan namatay gyud si Samson gumikan sa kagrabe sa mga naangkong kadaut sa lawas. – BANAT NEWS