Kabus hinabangan og lungon

CEBU, Philippines – Gitinguha karon sa kagamhanan sa dakbayan sa Sugbu nga mapadayon ang paghatag niini sa burial ug medical assistance ngadto sa mga mulopyo sa siyudad nga labaw'ng nanginahanglan sa nahisgutang hinabang.

Usa ka kamanduan nga giluwatan ni Bise Mayor Michael Rama atol sa iyang pagka-acting mayor sa dakbayan, ang giduso na ni City Administrator Francisco Fernandez ngadto sa konseho alang sa tukmang lakang nga pagahimoon.

Ang Executive Order ni Rama nagmando nga adto na kuhaon sa General Fund sa siyudad ang pundo nga gamiton alang sa paghatag sa City government og burial ug medical assistance ngadto sa mga mulopyo sa dakbayan.

Kini tungod kay ang pundo nga gikuhaan niini kaniadto giingong nagkuwang na tungod usab sa ubay-ubay nga mga request tungod kay ang   gisaligan sa dakbayan sa maong hinabang mao ang Philippine Charity Sweepstakes Office (PCSO) ug Philippine Amusement and Gaming Corporation (Pagcor) fund.

Gikataho nga daghan na nga mga request sa burial ug medical assistance ang nangatanggong karon diha sa City Hall tungod sa kakuwang sa pundo.

Pinaagi sa giluwatan nga executive order ni Rama gipaabot nga mapadayon na sa siyudad ang paghatag niini sa nahisgutang hinabang nga ibasi gihapon niini sa guidelines nga gikan sa PCSO.

Nasayran nga P5 mil ngadto sa P10 mil ang sagad nga mahatag sa siyudad nga burial ug medical assistance ngadto sa kabus nga mga mulopyo nga nanginahanglan niini. - Elly Bolonos (BANAT NEWS)