BHRT sa Mandaue gibanhaw

CEBU, Philippines – Gibanhaw karon sa kagamhanan sa dakbayan sa Mandaue ang Barangay Health and Response Team (BHRT) isip kabahin sa pagpangandam sa kabarangayan batok sa mga hulga sa nagkadaiyang matang sa balatian partikular na ang Influenza A(H1N1) virus.

Sa miaging panagtigom sa mga kadagkoan sa nagkadaiyang buhatan sa dakbayan uban sa mga barangay opisyal giuna og tuki ang mga pamaagi alang sa paglikay sa makatakboy nga mga balatian.

Si Dr. Expedito Medalla nga maoy hepe sa Regional Epedimiology Service Unit (RESU) sa Department of Health (DOH) 7 nga mitambong sa tigom mipasabot sa kamahinungdanon sa BHRT.

Gitataw niya nga niining panahona labing siguro nga dili na baboy ang nagdala sa maong matang sa kagaw kundili mga tawo na nga natakboyan niini gikan sa ubang kanasuran.

Matud pa ni Medalla ang mga sintomas sa tawong natakboyan sa maong sakit naglakip sa hilanat, pag-ubo, suka-suka, kalibanga, kakapoy sa lawas ug uban pa.

Si Mayor Jonas Cortes nga maoy nagpatawag sa maong panagtigom mipadayag nga nagkinahanglan ang kagamhanan og kooperasyon sa katawhan. - Romeo Limpangog (BANAT NEWS)