Balay ni Durano nasunog

CEBU, Philippines – Mokabat sa P500 mil ang kadaot sa mga nasunog nga kabtangan nga naglakip sa panimalay sa pamilyang Durano ug usa ka bakery ug karaang balay sa may dalan Juana Osmeña, sa barangay Camputhaw ning dakbayan, kagahapon sa alas 2:30 sa hapon.

Si SFO1 Milo Daculan, Fire Investigator sa Cebu City Fire Department mibutyag sa Banat News nga ang panimalay ni Mayor Ramonito Durano III sa dakbayan sa Danao, nga gipuy-an sa iyang nak nga si Mix Durano maoy usa sa naigo sa maong sunog.

Hinuon bisan kun ang maong sunog giisa ngadto sa second alarm, ang mga sakop sa kabomberohan nakapawong niini sulod lang sa singko minutos ug wala na makakaon pa ang kaayo og dugang mga kabalayan.

Usa sa naugdaw mao ang Fountain Bakery og duha ka andanang panimalay nga wala na puy-i sa tag-iyang   ginganlan lang og “Francisco” nga tupad sa panimalay sa pamilyang Durano.

Matud ni SFO1 Daculan nga ginama sa kahoy ingon semento ang mga dapat sa nahisgutang balay sa karaan busa dali kaayong mikatap ang kayo hangtod nga napagan ang panimalay sa mga Durano.

Hinuon gumikan sa kasolido sa mga bongbong ug atop sa balay sa mga Durano, kisame ra ug ang pader niini maoy nakan-an sa kayo ug ang kadaot gibanabana nga mo kabat lang og P10 mil.

Ang mga silingan nagkanayon nga sa wala pa masunog, may mga batang nanguha og basura sa sulod sa karaang balay nga wala nay nagpuyo ug gituohan nga mao kadtong mga bataa ang nagbutang og kayo didto sa sulod.

Wala usab mabantayi sa caretaker nga giila lang nga Nanay,  kay nag-atiman kini sa iyang bana nga naa pa sa tambalanan.

Hinuon walay mga kinabuhing napagan sa maong sunog, sumala pa sa mga bombero. – BANAT NEWS