Ombudsman gisaway ni Sepulveda

CEBU, Philippines – Gisaway ni Capitol Consultant Rory Jon Sepulveda ang buhatan sa Visayas Ombudsman gumikan kay kun dunay isyu nga motumaw batok sa mga opisyales sa probinsya sa Sugbu, imbestigahon dayon.

Gihimong basehanan ni Sepulveda ang gihimo sa Ombudsman sa pag-imbestigar sa gisulti ni Cebu City Mayor Tomas Osmeña nga scrap metals ang gipanggamit sa pagtukod sa Cebu International Convention Center (CICC).

Nakapanaway si Sepulveda sa taga Ombudsman gumikan kay wala gyud gani mo-imbestigar ang maong ahensya sa isyu sa towing services ug sa isyu sa Joint Venture Agreement tali sa siyudad ug Filinvest Land Incorporated (FLI).

Gitin-aw ni Sepulveda nga dili tinuod ang gisulti sa mayor kay ang Grandspan Development Corporation maoy nagtorno sa maong mga puthaw ug dili kini mga scrap metals.

Subling gipasabot niini, ang WT Construction, ang contructor sa CICC maoy nag-order sa maong mga puthaw gikan sa Grandspan ug dili ang Kapitolyo.

Apan iyang giklaro nga kung tinuod man ugaling ang gipanulti sa mayor dili magpanagana ang Kapitolyo paggukod ug pagpasaka’g kaso ngadto sa WT Construction.

Sa iyang bahin gitin-aw ni board member Juan Bolo nga dili na kinahanglan mo-imbestigar pa ang Ombudsman for the Visayas sa isyu sa pagtukod sa CICC.