Duha ka amang gidagit gilugos

CEBU, Philippines – Duha ka mga babayeng amang ang nabiktima sa pagpanglugos ingon man pagpangmolestiya kagahapon sa kaadlawon sa usa ka lalaking midagit kanila sa Mango Ave. nga gikakunsabo sa usa ka taxi driver ug midala kanila sa dakbayan sa Mandaue.

Usa sa mga suspek mao ang taxi driver nga si Ronald Briones, 40, taga dalan Abella sa barangay Guadalupe ning dakbayan nga gitumbok sa mga biktimang kakunsabo sa lalaking pasahero niini.

Ang mga biktimang nagpangidaron og 18-anyos nga taga Pasil ug ang usa 27-anyos taga barangay Lorega San Miguel ning dakbayan gikuyogan sa mga kabanay diha sa Pari-an Police Station aron mosumbong.

Ang duha pinaagi sa interpretasyon sa mga kabanay mibutyag nga gidagit sila sa usa ka dakong tawo nga may kaubang taxi driver ug gidala ug gilugos sila sa usa ka ngitngit nga kalibunan sa Hernan Cortes sa barangay Subangdaku.

Sumala pa sa pamahayag sa igsuon sa usa sa mga biktima, gidapog, gitamparos ingon man gimolestiya sa dakong tawo ang kinatawo samtang nagtion og kutsilyo, human niini gisunod gilayon ang 18-anyos pagdapog ug dayon gisukmag sa kuto-kuto ug dihang nawad-an og kusog gilugos kini sa maong lalaki.

Si Briones kansang taxi na-intercept sa kapolisan dihang gikahinabi sa Banat News mihimakak nga miapil siya sa pagpanglugos.

Sumala pa niini, duna siyay usa ka pasaherong lalaki nga misakay diha sa Mango Ave. kagahapon sa kaadlawon ug nagpahatud sa Hernan Cortes sa Mandaue.

Sa dayon na nilang biya sa lugar human makapasensilyo sa gasolinahan naagian nila ang duha ka mga babaye ug gimandoan siyang hunungan ang duha, sa pagtuong managkauban ra sila misunod usab si Briones.

Gikatahong mikanaog ang maong lalaki ug nakig-estorya sa duha ug dangtan pila ka gutlo nanakay sila sa taxi ug mimandong magpahatud sa Hernan Cortes.

Sumala pa niya pag-abot sa Subangdaku gipapaabot siya sa tulo nga nisulod sa usa ka panimalay nga adunay gate, ug dangtan ang dugay'ng pagpaabot migawas ang tulo ug gibayran ang P267 nga patak sa metrohan.

Human niini gipabalik og pasakay ang duha ka babaye ug gimandoan siya sa maong tawo nga ihatud silang duha diin sila gipik-ap.

Apan samtang nagpadulong sila sa Cebu City agi sa barangay Mabolo gikatahong langas kaayo ug saba ang duha ug sa iyang interpretasyon sa ilang senyas daw gilugos ang usa kanila ug dihang iyang gisenyasan pagpangutana mipadayag ang duha nga gilugos gyud sila.

Pag-abot sa Panagdait, Mabolo nanganaog ang duha. Sumala pa sa mga kabanay nangayo og tabang ang mga biktima sa ilang higala pagtawag og polis ug diha na gi-flash sa Hotline 166 ang plaka sa maong taxi unit ni Briones.

Si Briones na-intercep diha sa South Bus Terminal sa mga sakop sa Citiom ingon man Mobile Patrol Group kagahapon na sa alas 9 sa buntag ug gidala sa Pari-an Police Station.

Ang mga biktima positibong miila kaniya nga mao ang drayber nga kuyog sa maong tawong milugos kanila.

Ang duha gipaubos pa sa eksaminasyon sa pink room sa Vicente Sotto Memorial Medical Center.

Kagahapon sa udto ang mga sakop sa Parian Police Station mipagawas na og cartographic sketch sa maong tawo.

Ang hepe sa Parian Police Station Sr. Insp. Bonifacio Garciano, nagkanayon kaso gyud nga conspiracy ang ilang ipasaka kang Briones gumikan kay ang mga biktima mikumpirmar nga managhigala gyud kini ug ang suspek ug nagtinabangay pa sa pagsignit kanila pagpasakay sa taxi. – BANAT NEWS