Pagpalit og street foods idili

CEBU, Philippines – Gisuportahan sa mga sakop sa Hunta Probinsiyal ang tinguha sa Department of Health kon DOH nga did-an ang publiko pagpalit sa mga sinuroy nga pagkaon.

Sumala pa sa DOH di sigurado ang kalimpyo niini susama sa mga pagkaong, sud-an ug uban pa nga ipangladlad lang diha sa daplin sa dalan ug ang uban isuroy.

Si Provincial Board member Juan Bolo miawhag sa publiko nga karong dunay hulga sa sakit nga Influenza A(H1N1) virus angayang paminawon una ang tambag sa DOH.

Naobserbahan ni Bolo nga ang mga tindera og pagkaon nga magsuroysuroy sa kadalanan dili magpakabana sa pagtabon sa ilang gibaligya nga pagkaon base sa iyang nakita.

Lakip sa giawhag mao ang mga kabataang nagtungha nga diin anha ra mangaon sa mga pungko-pungko gawas sa ilang mga tunghaan sanglit ang uban sa mga naninda wala gani mga health cards ug sanitation clearances. 

Gikabalak-an sa DOH nga mas madali ang pagkatakboy sa mga makamatay’ng sakit pinaagi sa maong sistema sa pagpalit og pagkaon. - Chester Abadilla (BANAT NEWS)