Duna nay mga saksi sa pinusilay

CEBU, Philippines – Duna nay mga saksing mipatim-aw kabahin sa pinusilay sa barangay Maghaway, dakbayan sa Talisay nga miresulta sa kamatayon sa upat ka tawo lakip na sa usa ka barangay kagawad.

Si Supt. Henry Biñas, hepe sa Talisay City Police Station sa pakighinabi sa mga tigbalita mibutyag nga duna nay mga saksi nga mipatim-aw ug miluwat og affidavit.

Matud ni Biñas nga dunay mga saksing miluwat og affidavit pabor kang Kagawad Pedro Delvo ug duna say mga saksing mipabor sa tanod nga si Felix Abacahan Jr. kinsa pabilin pang naa sa tambalanan gumikan sa samad pinusilan.

Nasuta sa kapolisan nga daan nang dunay panagbingkil ang duha kaniadto pa ug gituuhang mao kini hinungdan sa ilang pagpinusilay atol sa bisperas sa pista sa maong barangay, apan wala ibutyag ang unod sa pamahayag sa mga saksi.

Gawas sa duha duna pay laing mga saksi ang miluwat usab sa ilang mga affidavit.

Kahinumduman nga si Delvo ug ang umagad niining si Alex Murallos namatay sa nahisgutang insidente samtang ang mga kauban usab ni Abacahan nga sila si Melchor Tabay ug Jonifer Villacencio nakabsan usab sa kinabuhi. - Brenda Batuto (BANAT NEWS)