CEBU, Philippines – Gihulagway ni Provincial Comelec Officer Lionel Marco Castillano nga pre-mature pa kaayo ang order sa Comelec en banc nga ipatuman sa Department of Interior and Local Government (DILG)-7 pagpalingkod na kang Mayor Rogelio Bacquerfo diha sa lungsod sa Tudela. Sumala pa niini base sa Rules of Procedure kinahanglan pa og order of finality kay gihatagan paman og 30 ka adlaw si Demetrio Granada sa Supreme Court. Kini alang sa writ of certiorari ug pagkuha usab og Temporary Restraining Order.
Apan matud ni Castillano kinahanglan mokuha si Bacquerfo og order of finality ngadto sa Comelec-Manila ug unya human sa order of finality mopagawas na pud niini og desisyon ang Comelec nga i-implementar na ang desisyon.
“Pero dili na mo-isyu ang Comelec og order of finality kung dili molapas ang 30 ka adlaw upon noticed, apan wala pamay 30 days siguro kay wala paman sila kakuha, mo-mosyon una ang abogado ni Bacquerfo ngadto sa Comelec Manila nga mangayo siya’g order of finality para ma-execute ang maong desisyon,” matud pang Castillano.
“Sakto na ang move ni Granada nga maka-certiorari sila kay maayong laki man siguro na iyang mga abogado nga maka certiorari sila with TRO,” dugang pang Castillano.
Gisalikway hinuon ni Castillano nga sayop ang lakang ni Bacquerfo nga nag-awhag sa DILG-7 ug PNP nga i-implementar na ang desisyon sa Comelec-Manila nga nag-ila kaniyang mayor, apan subling gipadayag niini nga sa pagkakaron premature pa gyud kaayo. Si Sr.Supt. Erson Digal sa CPPO nagkanayon nga naghuwat nalang siya sa DILG-7 kanus-a ipatuman ang desisyon ngadto sa Tudela.
“When it comes to assumption ang police nato is assistance lang…ang DILG gyud ana maoy lead agency unless, Comelec Manila orders Comelec Cebu nga maoy mo-implement sa desisyon,” nagkanayon si Castillano.
Tambag ni Castillano nila ni Bacquerfo ug Granada nga subayon ang mga proseso aron maresolbar ang maong problema. - Rey Pasaporte (BANAT NEWS)