6 bata gi-rescue gikan sa kano

CEBU, Philippines – Unom ka mga bata giluwas sa mga polis gikan sa usa ka negosyante nga Amerikano sa sitio Pabrika, barangay Talangan, lungsod sa Madridejos, isla sa Bantayan niadtong Miyerkules tungod sa taho nga gipang-molestiya sa langyaw.

Kasong child abuse ang gitakdang ipasaka batok ni Garylee Rohn, 69, tungod sa giingong pag-among-among niini sa unom ka mga bata nga nagpangidaron og 3 ngadto sa 15-anyos.

Si PO1 May Ann Tantano sa Women’s Desk sa Madridejos Police Station nagkanayon nga usa ka 19-anyos nga lalaki nga kanhi katabang ni Rohn misumbong sa kapolisan sa gikatahong pag-molestiya sa langyaw sa unom ka mga bata.

Sumala pa ni PO1 Tantano nga ang kanhi katabang mialegar nga ang unom ka mga bata gipang-finger sa Amerikano ug gipangtilaan pa ang mga kinatawo niini.

Ang kanhi katabang nagkanayon nga siya mismo nabiktima sa Amerikano human siya hilabti niini.

Ang Amerikano, matud pa niini, ganahan kaayo og mga bata ug adunay mga higayon nga anha kini niya pakatulgon sa iyang panimalay.

Si Rohn, sumala pa, adunay pending nga kasong rape ug nagkabulag na sa iyang asawa nga Pilipina. Apan wala makonpirmar sa kapolisan ang kasong rape niini.

Apan giklaro ni PO1 Tantano nga negatibo ang resulta sa paghiling sa doktor ngadto sa unom ka mga bata.

Apan bisan nasuta nga wala mahilabti ang mga bata, magpadayon gihapon ang kaso batok ni Rohn.

Si Rohn gipresentar sa mga sakop sa media sa buhatan ni Cebu Provincial Police Office (CPPO) OIC Supt. Erson Digal.

Sa iyang bahin, si Rohn mihimakak sa pasangil nga iyang gimolestiya ang unom ka mga bata.

Matud ni Rohn nga gikonsiderar niyang mga anak ang mga bata. Adunay mga adlaw nga iyang pakan-on sa dili pa manulod sa klase ang mga bata.

Gani, sumala pa ni Rohn nga lakip ang mga ginikanan sa mga bata iyang gipakaon ug ang mga bata hatagan og kuwarta ug pamalitan og mga kagamitan sa pagtungha.

Gitumbok ni Rohn ang usa ka Marvin Salazar nga maoy giminyoan sa iyang kanhi asawa nga maoy nagpaluyo sa mga reklamo batok niya.

Si Rohn nia na manimuyo dinhi sa Sugbo human gibaligya ang iyang mga katigayonan didto sa Amerika.

Si Supt. Digal nagkanayon nga bisan dili interesado ang mga ginikanan sa mga bata pagpasaka og kaso, ila gihapon kining ipasaka. – BANAT NEWS