Mga Barangay Health Workers gipaubos first aid training

CEBU, Philippines – Ubay-ubay nga mga Barangay Health Workers (BHW) sa dakbayan sa Sugbu ang ipaubos sa First Aid Emergency Care Training.

Kini aron mao nay unang motubag diha sa ilang tagsa-tagsa ka barangay sa higayon nga dunay motumaw nga mga emerhensya.

Ang mga BHW tudloan og first aid sama sa Cardio Pulmonary Resuscitation (CPR) ug uban pa nga mahimong i-aplay ngadto sa mga biktima.

Moabot sa 480 ka mga BHW gikan sa 80 ka mga barangay sa siyudad ang ipaubos sa nahisgutang training sa mosunod nga mga adlaw.

Ang kagamhanan sa dakbayan migahin na og P270 mil alang sa pagpahigayon sa First Aid Emergency Care Training.

Gitahasan nga mopahigayon sa nahisgutang training ngadto sa mga BHW mao ang mga volunteer sa Emergency Rescue Unit Foundation (Eruf).

Nasayran nga ang Eruf usab maoy gisangunan sa city government alang sa pagpahigayon og Barangay Disaster Training Program.

Ang mga volunteer gikan sa 30 ka mga barangay sa siyudad maoy unang ipaubos sa nahisgutang programa sa musunod nga mga adlaw.

Ang kagamhanan sa dakbayan migahin na usab og kapin sa P4.6 milyones isip financial assistance ngadto sa Eruf alang sa maong programa. - Elly Bolonos (BANAT NEWS)