Anti-pornography bill ipadali pagpasar

CEBU, Philippines – Miapil na ang konseho sa dakbayan sa Sugbo sa panawagan nga dalion pagpasar ang mga balaodnon nga magsilot niadtong mo-upload og mga sex video diha sa internet.

Usa ka resolusyon nga gipalabang ni Konsehal Arsenio Pacaña ang giaprobahan atol sa sesyon sa City Council kagahapon nga alang sa maong katuyoan.

Nasayran nga nag-ung-ong karon sa Senado ingon man sa Ubos Balay Balauranan ang Anti-Pornography ug ang Voyeurism Bill.

Giawhag sa City Council ang kongreso nga dalion ang pagpalabang sa nahisgutang proposed measures aron usab mapatuman sa labing dali nga panahon.

Matud ni Pacaña nga dako og mahatag nga kadaot ngadto sa kababayen-an ang pag-upload sa mga sex video ngadto sa internet.

Dugang kadaot nga mahatag niini kun matan-awan sa mga minor de edad nga dili angayang makakita sa usa ka pribado ug sensitibong buhat.

Kini ilabi na kun dunay himuon usab nga mass production sa mga sex video pinaagi sa mga DVD ug ipamaligya ngadto sa publiko. - Elly Bolonos (BANAT NEWS)