3 ex-convict nagpinusilay

CEBU, Philippines – Igsuon ingon-man pag-umangkon sa kapitan sa barangay Carreta nalakip sa upat nga naangol atol sa pinusilay tali sa tulo ka ex-convict kagahapon sa buntag sa may Ponce II, Sitio Sto. Niño, barangay Carreta ning dakbayan.

Naangol ang igsuon ni Kapitan Eduardo “Boloy” Lauron sa Carreta nga si Natalio “Natnat” Lauron, 36, kinsa samdam sa tiyan. Samdan usab sa walang bukton ang ig-agaw niining si Romulo Ligan, 45, ex-convict ug mga ex-convict nga sila si Dindo Ancero, 30, taga Malingin lungsod sa Bogo, ug Ronnie Lape, 30, taga dakbayan sa Toledo nga kasamtangang nagpuyo sa maong dapit.

Si PO3 Geffrey Gutual, imbestigador sa Homicide Section sa Cebu City Police Office miasoy sa Banat News nga ilang gi-aresto sila si Lape ug si Ancero human sa punisilay.

Nadakpan si Ancero sa North General Hospital kagahapong adlawa human nagpatambal sa iyang samad pinusilan diha sa iyang dughan sa dihang nabulit sa bala sa shotgun gikan sa pugakhang nga gigamit ni Lape.

Matud pa ni PO3 Gutual nga si Ancero mitug-an nga nagsakay siya sa iyang Honda Wave (7396 GC) sa maong dapit sa dihang nangitag mga pisa sa sakyanan dinhi sa dakbayan.

Apan mihunong siya sa dapit nahitaboan human magpa-load sa iyang cellphone ug naatol usab nga nagkakita sila si Ligan kinsa iyang nahigala nang daan dihang nabilanggo sila sa Cebu City Jail nga mitimbaya og tawag “gaw” kaniya.

Wala damha miduol ang ex-convict nga si Lape nga nangutana ngadto kang Ligan nga “imo diay ning higala?” dayon pusil sa gidalang pugakhang ngadto kang Ancero ug si Ligan kinsa miwahing sa pugakhang naigo usab sa walang kamot. Si Ancero nga samaran sa dughan nakahimo pa pagbawos sa pagpusil kang Lape makaduha kahigayon hinungdan sa pagkaigo niini sa tuong kamot ug walang kilid.

Gikonpirmar ni PO3 Gutual nga si Ancero nabilanggo na sa City Jail gumikan sa mga kaso niining pagpanulis. Gani naapil kini sa pagpanulis sa A1 Financing Inc. samtang si Lape nalambigit sa tulis.

Si Ligan   niadto lang Disyembre 31, 2008 nakagawas.

Si Ancero nakuhaan og .45 didto na sa tambalanan.

Matud ni PO3 Gutual nga dili pa nila mabutyag ang motibo tungod kay mobalik pa sila sa crime scene gumikan kay dunay report nga nalambigit sa illegal nga drugas si Lape.

Si Kapitan Lauron nga nahinabi sa mga tigbalita nagkanayon nga nadamay lang ang iyang manghod nga si Natnat niadtong higayona sa dihang nagbarog-barog kining nag-text daplin sa dalan atol sa pinusilay.

Matud pa niini nga si Lape dunay gikaaway sa wala pa ang insidente nga nagsakay og motorsiklo nga wala makuha ang plate number niadtong higayona hinungdan nga nahitabo ang pinusilay.

Apan sumala pa sa mga saksi nga nasaypan nga asset sa kapolisan si Ancero hinungdan nga gipusil kini ni Lape kinsa giingong notadong drug pusher sa barangay Carreta. – BANAT NEWS