Cris Saavedra mokiha napud ni Gwen
CEBU, Philippines – Gitinguha karon ni anti graft crusader Crisologo Saavedra ang pagpasaka og dugang pang mga kaso batok ni Gobernador Gwendolyn Garcia.
Kasong technical malversation ang giandam ni Saavedra nga ipasaka batok sa gobernador sa higayon nga bayran niini ang kontraktor sa Cebu International Convention Center (CICC) sa P263 milyones nga gimando sa korte alang sa giingong additional works sa proyekto.
Matud ni Saavedra “dishonesty” ang himuon sa gobernador kun motugot sa additional work sa CICC nga wala maapil sa kontrata.
Alang kang Saavedra makonsiderar nga usa ka pribadong transaksyon tali sa gobernador ug WT Construction ang maong additional work sa CICC ug angay lang nga bayran kini sa iyang personal nga salapi.
Midugang si Saavedra nga kalapasan sa Akta Republika 9184 ang additional work sa WT Construction sa CICC gawas nga walay kontrata wala usab kini approved funding sa provincial board.
Niadtong miaging adlaw subling misang-at og reklamo si Saavedra batok kang Garcia sa Ombudsman nga nag-awhag pag-imbestigar sa kalapasan niini sa R.A 9184 kun Government Procurement Law ug R.A 3019 kun Anti Graft and Corrupt Practices Act.
Apan sa iyang bahin si Capitol consultant Rory Jon Sepulveda wala na mokomentaryo sa alegasyon ni Saavedra.
Matud ni Sepulveda nga daghan na kaayong gisang-at nga reklamo ni Saavedra apan walay positibong resulta. - Rey Pasaporte (BANAT NEWS)
- Latest
- Trending
