2 ka tulisan sa Lapulapu tiklo

CEBU, Philippines – Nadakpan sa kapolisan sa dakbayan sa Lapulapu sa miaging gabii ang duha ka gikatahapang tulisan uban sa kutsilyo ug frontier nga armas nga ilang gigamit sa pagpanulis. Sila giila nga si Paul Perlete, 28, ug Armando Loreto, 25 , nga pulos ulitawo ug nagpuyo sa maong dapit kinsa maoy gikatahapan nga nagtulis nila ni Genalyn Rosaroso, 27, ug Ruben Corbedo, hingkod, nga drayber sa traysikol sa maong dakbayan. Si PO3 Joseph Damasco sa theft and robbery section sa Lapulapu City Police Station mibutyag sa Banat News nga pasahero ni Corbedo si Rosaroso kinsa misakay gikan sa gitrabahoang establisamento sa dalan M.L. Quezon sa maong dakbayan.

Samtang nagpadagan si Corbedo sa iyang traysikol duol sa gasoline station sa ML Quezon, may mipara nga duha ka wala hiilhing lalaki ug misakay usab kini sa maong traysikol.

Apan human kini makatongtong sa traysikol, milanit dayon sa ilang mga hinagiban ug mideklarar nga tulis ug gimandaran dayon si Rosaroso nga ipatunol ang iyang alahas, cellphone, ug uban pang mga butang diha sa iyang bag diin didto ang P1,000 ug ang iyang uniporme sa trabaho.

Human himolboli si Rosaroso sa iyang mga butang, dali kaayong misibat ang mga suspetsado. Apan ang mga biktima mitaho usab dayon sa kapolisan kinsa human masayod sa maong hitabo, milihok dayon kini nga misangpot sa pagkasikop sa maong mga suspetsado.

Nabawi sa biktima ang iyang mga butang ug ang kuwarta nga wala pa magasto sa mga suspetsado kinsa   nagpahayahay na karon sa prisohan sa dakbayan sa Lapulapu samtang nagpaabot sa tukmang kiha batok kanila. - Romeo T. Limpangog ug Bong Soriano (BANAT NEWS)